રાજ્યના નાગરિકોને જીવનજરૂરી દવાઓ શુદ્ધ અને ગુણવત્તાયુક્ત મળી રહે તે માટે ગુજરાત સરકારના ખોરાક અને ઔષધ નિયમન તંત્ર દ્વારા બનાવટી, ડુપ્લિકેટ અને ગેરકાયદેસર દવાઓના વેચાણ સામે કડક કાર્યવાહી હાથ ધરાઈ છે. તાજેતરમાં મળેલી બાતમીના આધારે અમદાવાદ સહિત વિવિધ સ્થળોએ છેલ્લા ત્રણ દિવસથી સઘન તપાસ હાથ ધરાઈ છે. તંત્રને માહિતી મળી હતી કે જે. બી. કેમિકલ્સ એન્ડ ફાર્માસ્યુટિકલ્સ લિ., ભરૂચ દ્વારા ઉત્પાદિત નિકાર્ડિયા રિટાર્ડ-૧૦ ટેબ્લેટ, બનાવટી અથવા ડુપ્લિકેટ દવા અમદાવાદના સેટેલાઇટ વિસ્તારમાં આવેલી લીલાવતી ફાર્મસી એન્ડ વેલનેસ પ્રા. લિ. ખાતે વેચાતી હોવાની શક્યતા છે. આ માહિતીના આધારે તા. ૧૯ ઓગસ્ટથી અમદાવાદ અને અન્ય સ્થળોએ તપાસ શરૂ કરવામાં આવી છે. છેલ્લા ત્રણ દિવસ દરમિયાન તંત્ર દ્વારા ૩૦થી વધુ પેઢીઓ અને મેડિકલ સ્ટોરમાં તપાસ કરવામાં આવી છે. તપાસ હજુ પણ ચાલુ છે. તપાસ દરમિયાન નડિયાદના કિશન મેડિકલ સ્ટોરમાંથી જે. બી. કેમિકલ એન્ડ ફાર્માસ્યુટિકલ લિ., ભરૂચના નામે દર્શાવાયેલી નિકાર્ડિયા રિટાર્ડ-૧૦ ટેબલેટ, બેચ જથ્થો મળી આવ્યો હતો. આ દવાના કુલ ૬૬૦ ટેબ્લેટ નિયત નમૂના હેઠળ જપ્ત કરી તેનું પરીક્ષણ કરવા માટે મોકલી અપાયું છે. આ ઉપરાંત પાર્શ્વ મેડિકલ એજન્સી, પાલડી, અમદાવાદથી એપેક્ષ ફાર્મા એજન્સી, ભાવનગર મારફતે રોટરી ટીમ્બી મેડિકલ સ્ટોર્સ, ટીમ્બી જી: ભાવનગર ને સપ્લાય કરાયેલ ઉક્ત દવાની ૫૯૦ ટેબ્લેટનો જથ્થો જપ્ત કરાયો છે. આ ઉપરાંત તપાસ દરમિયાન અન્ય શંકાસ્પદ દવાઓના પણ નમૂના લેવામાં આવ્યા છે અને સંબંધિત જથ્થાને પ્રતિબંધિત કરવામાં આવ્યો છે. તેમાં વિવિધ બેચની નિકાર્ડિયા રિટાર્ડ-૨૦ ટેબ્લેટસ, તથા નિકાર્ડિયા રિટાર્ડ- ૧૦ ટેબ્લેટ્સનો સમાવેશ થાય છે. વિવિધ પેઢીઓમાંથી અંદાજે રૂ. ૧.૭૦ લાખની કિંમતનો શંકાસ્પદ દવાનો જથ્થો નિયત નમૂના હેઠળ પ્રતિબંધિત કરાયો છે. પ્રાથમિક તપાસમાં શંકાસ્પદ દવાની સપ્લાય ચેન પણ સામે આવી છે. તપાસ મુજબ સપ્લાય ચેન નીચે મુજબ છે. સેના ફાર્માસ, લખનઉ (ઉત્તર પ્રદેશ) પાર્થ મેડિકલ એજન્સી, પાલડી, અમદાવાદ પારસ ઈકોમેડ, સેટેલાઇટ, અમદાવાદ સાણંદ મેડિકલ સ્ટોર, સાણંદ લીલાવતી ફાર્મસી એન્ડ વેલનેસ પ્રા. લિ., સેટેલાઇટ, અમદાવાદ સુધી હોવાનું જાણવા મળ્યું છે. તંત્ર દ્વારા સંબંધિત અન્ય પેઢીઓની ખરીદ-વેચાણની વિગતોની પણ ચકાસણી કરાઈ છે. સમગ્ર મામલે સઘન તપાસ ચાલુ છે અને તપાસનો વ્યાપ ઉત્પાદક સુધી લઈ જવાશે. જરૂર જણાશે તો સંડોવાયેલા લોકો સામે પોલીસ કાર્યવાહી પણ કરવામાં આવશે.