ત્રણેય ફોર્મેટમાં ભારતીય ટીમમાં સ્થાન મેળવવામાં નિષ્ફળ રહ્યા બાદ, સૂર્યકુમાર યાદવને હવે મુંબઈની રણજી ટ્રોફી ટીમમાંથી બહાર કરાયો છે. મુંબઈ ૧૧ ઓક્ટોબરે ચંદીગઢ સામે પોતાનું અભિયાન શરૂ કરશે. 

સૂર્યકુમારે પસંદગી માટે પોતાને ઉપલબ્ધ કરાવ્યા હતા, પરંતુ પસંદગીકારોએ તેમને ટીમમાં સામેલ કર્યા ન હતા. સૂર્યકુમારે મુંબઈ પસંદગી સમિતિને સંદેશ મોકલીને તેમની ઉપલબ્ધતાની જાણ કરી હતી. જાેકે, પસંદગીકારો તેમના રેડ-બોલ ફોર્મ અંગે સંપૂર્ણપણે વિશ્વાસ ધરાવતા ન હતા. મુંબઈએ આ મેચ માટે ૧૬ સભ્યોની ટીમ પસંદ કરી છે યુવા બેટ્સમેન આયુષ મ્હાત્રેને ઉપ-કપ્તાન તરીકે નિયુક્ત કર્યા છે. પસંદગીકારો તેમને ભાવિ કેપ્ટન તરીકે તૈયાર કરવા માંગે છે. મ્હાત્રેએ ભારતને અંડર-૧૯ વર્લ્ડ કપ ટાઇટલ અપાવ્યું હતું. જાેકે, ફર્સ્ટ-ક્લાસ ક્રિકેટમાં તેમનો અનુભવ મર્યાદિત છે. તેમણે બે વર્ષમાં ફક્ત ૧૩ ફર્સ્ટ-ક્લાસ મેચ રમી છે. આમ છતાં, પસંદગીકારોએ અનુભવી સરફરાઝ ખાન કરતાં ટીમનું નેતૃત્વ કરવા માટે મ્હાત્રે પર વિશ્વાસ વ્યક્ત કર્યો છે. મુંબઈના મુખ્ય પસંદગીકાર રમેશ પવારે સૂર્યકુમારની ગેરહાજરીનું કારણ સમજાવ્યું. તેમણે કહ્યું, તે ચોક્કસપણે મોટા મેચનો ખેલાડી છે અને મુંબઈ માટે એક સાબિત પ્રદર્શન કરનાર છે. અમે ઇચ્છીએ છીએ કે તે કેટલીક રેડ-બોલ મેચ રમે અને તેની લય પાછી મેળવે. સૂર્યકુમારે છેલ્લા ૧૮ મહિનામાં રેડ-બોલ મેચ રમી નથી, તેથી અમે ઇચ્છીએ છીએ કે તે થોડી મેચ રમે અને પછી ટીમમાં સ્થાન મેળવી શકે.” ભારતના ઓપનર યશસ્વી જયસ્વાલે શરૂઆતની મેચ માટે તેની ઉપલબ્ધતાની પુષ્ટિ કરી છે અને તેને ૧૬ સભ્યોની ટીમમાં સામેલ કરવામાં આવ્યો છે. રણજી ટ્રોફી મેચ તેને નવેમ્બરમાં ન્યુઝીલેન્ડ સામેની ટેસ્ટ શ્રેણી પહેલા મહત્વપૂર્ણ મેચ પ્રેક્ટિસ પૂરી પાડશે. દરમિયાન, શાર્દુલ ઠાકુર ઈજાને કારણે પ્રથમ બે મેચ ગુમાવી શકે છે. તાલીમ દરમિયાન તેની આંગળીમાં ફ્રેક્ચર થયું હતું.