ગાંધીનગરના કુડાસણમાં રહેતા અને અડાલજ-પોર ગામની સીમમાં આવેલી કરોડો રૂપિયાની કિંમતી વડીલોપાર્જિત જમીન ધરાવતા એક યુવાન ખેડૂતને સ્વરક્ષણ માટે હથિયારનો પરવાનો અપાવવાની લાલચ આપી તેના જ ઓળખીતા મિત્ર સહિત ચાર શખ્સોએ રૂ.૧૫ લાખની મસમોટી છેતરપિંડી આચરી હોવાનો ચોંકાવનારો કિસ્સો પ્રકાશમાં આવ્યો છે. આટલેથી પણ ન અટકતા આરોપીઓએ પૈસા પરત માંગતા ખેડૂતને અપહરણ કરી ગોળી મારી જાનથી મારી નાખવાની ધમકી આપી વધુ રૂ.૪.૭૦ લાખની ખંડણીની માંગણી કરી હોવાનું પોલીસ ફરિયાદમાં જણાવાયું છે. સમગ્ર મામલે ઇન્ફોસિટી પોલીસે ગુનો નોંધી આરોપીઓની શોધખોળ શરૂ કરી છે. પોલીસ ફરિયાદ મુજબ, કુડાસણ ગામની કેશવ આરાધ્યમ સોસાયટીમાં રહેતા જય રાજેન્દ્રકુમાર પટેલ મૂળ પોર ગામના વતની છે. તેમના પરિવાર પાસે અડાલજ અને પોર ગામની સીમમાં આવેલી વડીલોપાર્જિત જમીન છે, જેની બજાર કિંમત કરોડો રૂપિયામાં પહોંચી ગઈ છે. કિંમતી જમીનને કારણે ભૂમાફિયાઓ અને અસામાજિક તત્વો તરફથી સતત કાવતરાં રચાતા હોવાના કારણે ફરિયાદીને પોતાના જીવનું જાેખમ હોવાની લાગણી હતી.