કચ્છની રણધરતી પર જ્યાં અન્ન પાકવું જોઈએ ત્યાં અફીણ અને ગાંજાની ગેરકાયદેસર ખેતીનો મોટો ભંડાફોડ થયો છે. રાપર તાલુકાના ભીમાસર ગામની સીમમાં ભુજ બોર્ડર રેન્જ સાયબર સેલ અને સ્થાનિક પોલીસ દ્વારા સંયુક્ત દરોડો પાડીને અંદાજે 2 એકર જમીન પર થયેલા અફીણ (પોસ્ટ ડોડા) અને ગાંજાના વાવેતરનો પર્દાફાશ કરવામાં આવ્યો છે. પોલીસે સ્થળ પરથી મોટી માત્રામાં નશીલા છોડ જપ્ત કર્યા છે અને 3 આરોપીઓને ઝડપી જેલહવાલે કર્યા છે.

રાજ્યમાં વધતા નશાના કારોબાર સામે સરકાર કડક કાર્યવાહી કરી રહી છે. Harsh Sanghavi એ વિધાનસભામાં માહિતી આપતાં જણાવ્યું હતું કે રાજ્ય સરકાર નશામુક્ત ગુજરાત બનાવવા માટે પ્રતિબદ્ધ છે અને આંતરરાજ્ય તથા આંતરરાષ્ટ્રીય નશા રેકેટ સામે સતત અભિયાન ચાલી રહ્યું છે. ઓડિશાના પાંડી બ્રધર્સ સહિત નશા માફિયા સામે કડક કાર્યવાહી હાથ ધરવામાં આવી છે.

કચ્છ જેવા સરહદી જિલ્લામાં આ પ્રકારની ગેરકાયદેસર પ્રવૃત્તિ સામે પોલીસે મોટી સફળતા મેળવી છે. હવે તપાસ ચાલી રહી છે કે આ નશીલા પદાર્થોનું નેટવર્ક ક્યાં સુધી ફેલાયેલું હતું અને તેનો સપ્લાય કયા વિસ્તારોમાં થવાનો હતો.

નશા યુવાનોના ભવિષ્યને બરબાદ કરે છે. સમાજ અને દેશના હિત માટે નશાથી દૂર રહેવું એ જ સાચો રસ્તો છે.