દિલ્હી-

દેશમાં કોરોનાવાયરસે જે રીતે જનતાને દુઃખી કર્યા છે તેવી જ રીતે પેટ્રોલ-ડીઝલનાં ભાવ પણ સતત વધતા હોવાના કારણે લોકો હેરાન-પરેશાન થઇ ગયા છે. આ વચ્ચે કેન્દ્રીય પેટ્રોલિયમ મંત્રી ધર્મેન્દ્ર પ્રધાને પેટ્રોલ, ડીઝલ અને એલપીજીનાં ભાવમાં વધઘટ વચ્ચે એક મોટી વાત કહી છે.

મંત્રીએ કહ્યું કે, પેટ્રોલ-ડીઝલ અને એલપીજીનાં ભાવ હવે નીચે આવી રહ્યા છે અને તેઓ આગામી દિવસોમાં વધુ ઘટશે. તેમણે કહ્યું કે, અમે અગાઉ પણ કહ્યું હતું કે અમે આંતરરાષ્ટ્રીય બજારમાં ક્રૂડ ઓઇલનાં ભાવમાં થયેલા ઘટાડાનો લાભ અંતિમ ગ્રાહકોને ટ્રાન્સફર કરીશું. આપને જણાવી દઇએ કે, અગાઉ લોકસભામાં, વધતા જતા ઇંધણનાં ભાવ અંગેનાં પ્રશ્નોનાં જવાબમાં પેટ્રોલિયમ મંત્રી ધર્મેન્દ્ર પ્રધાને કહ્યું હતું કે, છેલ્લા સાત વર્ષમાં સ્થાનિક એલપીજી સિલિન્ડરની કિંમતમાં બમણો વધારો થયો છે. અત્યારે ભાવ પ્રતિ સિલિન્ડર ૮૧૯ રૂપિયા છે. આ સમય દરમિયાન પેટ્રોલ અને ડીઝલ પર ટેક્સમાં ૪૫૯ ટકાનો વધારો થયો છે.

પેટ્રોલિયમ મંત્રી ધર્મેન્દ્ર પ્રધાને કહ્યું હતું કે, છેલ્લા કેટલાક વર્ષોમાં કિંમતોમાં ક્રમશ વધારાને લીધે એલપીજી અને કેરોસીન પરની સબસિડી (પીડીએસ હેઠળ) સમાપ્ત થઈ છે. પ્રધાને કહ્યું કે, છેલ્લા કેટલાક મહિના દરમિયાન ઘરેલું એલપીજી સિલિન્ડરની કિંમતમાં વધારો થયો છે. ડિસેમ્બર ૨૦૨૦ માં, તેની કિંમત પ્રતિ સિલિન્ડર ૫૯૪ રૂપિયા હતી.


Comments

કોમેન્ટ પોસ્ટ કરવા માટે લાગિન કરો