ભારતીય રાજકારણમાં પૈસા ફક્ત રાષ્ટ્રીય પક્ષોમાં જ કેન્દ્રિત નથી હોતા, પ્રાદેશિક પક્ષો પણ આર્થિક રીતે મજબૂત બન્યા છે. રાજકીય દાનની વાત આવે ત્યારે આ ધારણા વધુ મજબૂત બને છે. ૬ ઓગસ્ટના રોજ પ્રકાશિત થયેલા નાણાકીય વર્ષ ૨૦૨૪-૨૫ માટે એસોસિએશન ફોર ડેમોક્રેટિક રિફોર્મ્સ (એડીઆર)નો રિપોર્ટ એક નવું ચિત્ર રજૂ કરે છે. રિપોર્ટના ડેટા દર્શાવે છે કે ભારતના આઠ મુખ્ય પ્રાદેશિક પક્ષોએ ૨૦૨૪-૨૫માં એટલું બધું ભંડોળ એકત્ર કર્યું છે કે તેઓ ભાજપ અને કોંગ્રેસ સિવાય અન્ય તમામ રાષ્ટ્રીય પક્ષોને પાછળ છોડી દીધા છે, જેમાં આમ આદમી પાર્ટી, બહુજન સમાજ પાર્ટી, કોમ્યુનિસ્ટ પાર્ટી ઓફ ઈન્ડિયા-માર્ક્સવાદી અને નેશનલ પીપલ્સ પાર્ટીનો સમાવેશ થાય છે. આ રિપોર્ટ સમજાવે છે કે પ્રાદેશિક પક્ષોને આટલું બધું દાન કેમ મળી રહ્યું છે અને તેમને પૈસા ક્યાંથી મળી રહ્યા છે. તાજેતરના રિપોર્ટ દર્શાવે છે કે ૨૦૨૩-૨૪ની સરખામણીમાં ૨૦૨૪-૨૫માં પ્રાદેશિક પક્ષોના ખજાનામાં લગભગ ત્રણ ગણો વધારો થયો છે, જેમાં રૂ.૨૦,૦૦૦થી વધુનું દાન છે. નાણાકીય વર્ષ ૨૦૨૩-૨૪ પ્રાદેશિક પક્ષોને કુલ રૂ.૩૪૭.૬૯ કરોડનું દાન મળ્યું હતું. નાણાકીય વર્ષ ૨૦૨૪-૨૫માં આ આંકડો વધીને રૂ.૧,૦૫૧.૫૬ કરોડ (લગભગ ૧૯૮% નો વધારો) થયો હતો. દાનની સંખ્યામાં પણ ૮૫%નો મોટો ઉછાળો જાેવા મળ્યો હતો. ૨૦૨૩-૨૪માં પ્રાદેશિક પક્ષોને ૨,૮૬૧ દાન મળ્યું, જે ૨૦૨૪-૨૫માં વધીને ૫,૨૯૭ થયું હતું. ભાજપ અને કોંગ્રેસ સિવાય રિપોર્ટ મુજબ, ટોચના પાંચ પ્રાદેશિક પક્ષો (ડીએમકે, એઆઇટીસી, વાયએસઆરસીપી, ટીડીપી અને એઆઈએડીએમકેને કુલ રૂ.૮૪૦.૧૨ કરોડ મળ્યા, જે ૨૦૨૪-૨૫માં પ્રાદેશિક દાનના ૭૯.૯% છે. આ વિશાળ દાન આકાશમાંથી પડ્યું ન હતું. મુખ્ય વ્યાપાર ગૃહો અને ચૂંટણી ટ્રસ્ટો તેની પાછળ સીધા છે.