દેશભરમાં રક્ષાબંધનના પવિત્ર પર્વની ઉજવણી કરવામાં આવી હતી, ત્યારે હિંમતનગર સ્થિત સાબરકાંઠા જિલ્લા જેલમાં પણ તેની વિશેષ ઉજવણી કરાઈ. જેલમાં બંધ કેદી ભાઈઓને રાખડી બાંધવા માટે મોટી સંખ્યામાં બહેનો જેલ પરિસરમાં પહોંચી હતી. લાંબા સમય બાદ ભાઈ-બહેનના મિલન સમયે ભાવુક દ્રશ્યો સર્જાયા હતા. રક્ષાબંધનના પવિત્ર પર્વને અનુલક્ષીને જેલ પ્રશાસન દ્વારા કેદી ભાઈઓ અને તેમની બહેનોના મિલન માટે ખાસ વ્યવસ્થા ગોઠવવામાં આવી હતી. સવારથી જ બહેનો પોતાના ભાઈઓને રાખડી બાંધવા જેલ પરિસરમાં ઉમટી પડી હતી. બહેનોએ ભાઈઓના કાંડે પ્રેમ અને રક્ષણનું પ્રતીક એવી રાખડી બાંધી, અને મોં મીઠું કરાવ્યું હતું. ભાઈ-બહેનના આ મિલન સમયે લાગણીઓ છલકાઈ હતી. લાંબા સમય બાદ પોતાના ભાઈને મળતા અનેક બહેનોની આંખોમાં ખુશી અને ભાવુકતાના આંસુ જાેવા મળ્યા હતા. કેદી ભાઈઓએ પણ બહેનોને આશીર્વાદ આપી તેમના સુખી જીવનની કામના કરી હતી. જેલ પ્રશાસન દ્વારા કરવામાં આવેલી આ વ્યવસ્થાથી મુલાકાતે આવેલી બહેનોમાં સંતોષ જાેવા મળ્યો હતો. રક્ષાબંધનના આ પ્રસંગે કેદીઓમાં પણ પરિવાર સાથે જાેડાયેલી લાગણીઓ વધુ મજબૂત બની હતી. ગુના અને સજા વચ્ચે પણ પરિવાર પ્રત્યેનો પ્રેમ અને લાગણી અકબંધ રહે છે. સાબરકાંઠા જિલ્લા જેલમાં યોજાયેલી રક્ષાબંધનની આ ઉજવણી તેનું એક ભાવુક ઉદાહરણ પૂરું પાડે છે. જેલ તંત્રના આવા માનવીય અભિગમથી કેદીઓને પરિવાર અને સમાજના મુખ્ય પ્રવાહ સાથે જાેડાયેલા રાખવામાં મદદ મળી શકે છે.