મુંબઇ 

બોલિવૂડ એક્ટ્રેસ કંગના રનોટે તેના ભાઈ અક્ષતના લગ્નનો વધુ એક વિડીયો શેર કર્યો કે જેમાં તે વાદળી એટલે કે બ્લૂ લહેંગામાં ડાન્સ કરતી જોવા મળી રહી છે. કંગના રનોટે આ સુંદર વિડીયો શેર કરતા જણાવ્યું કે લગ્ન માટેનો આ ખાસ વાદળી લહેંગો તૈયાર કરવામાં 14 મહિનાનો સમય લાગ્યો છે.

કંગના રનોટ આ વિડીયોમાં ભાઈ અક્ષતના લગ્ન માટે તૈયાર થયેલી જોવા મળી રહી છે. કંગનાએ આ વિડીયો શેર કરતા લખ્યું કે જે લોકો મારા આ લહેંગા વિશે પૂછી રહ્યા હતા તેઓને જણાવી દઉં કે આ ગુજરાતી બાંધણી લહેંગો છે. આ લહેંગો તૈયાર કરવામાં 14 મહિના લાગ્યા છે. આ સાથે જ કંગના રનોટે પોતાના આઉટફિટ ડિઝાઈનર (અનુરાધા વકીલ) અને જ્વેલરી ડિઝાઈનર સબ્યસાચીની પ્રશંસા કરી છે. 

એવું જાણવા મળી રહ્યું છે કે કંગના રનોટે આ લગ્ન પાછળ આશરે રૂપિયા 6 કરોડનો ખર્ચો કર્યો છે. ભાઈ અક્ષતના લગ્નમાં કંગનાએ પોતાની પર્સનલ જ્વેલરી પાછળ રૂપિયા 45 લાખ કરતા વધુનો ખર્ચો કર્યો. જ્યારે આઉટફિટ પર 18 લાખ રૂપિયા કરતા વધુનો ખર્ચો કર્યો છે. અહીં ઉલ્લેખનીય છે કે બોલિવૂડ એક્ટ્રેસ કંગના રનોટના ભાઈ અક્ષતના ધામધૂમથી લગ્ન થઈ ગયા છે. હવે આ લગ્નના સુંદર ફોટોગ્રાફ્સ અને વિડીયો સામે આવી રહ્યા છે. કંગનાના ભાઈ અક્ષતે ઉદયપુરમાં ડેસ્ટિનેશન વેડિંગ કર્યા છે. આ લગ્નના ફંક્શનના ઘણાં વિડીયો અને ફોટોગ્રાફ્સ સોશિયલ મીડિયા પર છવાઈ ગયા છે. 

કંગનાના ભાઈ અક્ષતના લગ્ન પરંપરાગતરીતે થયા. લગ્નના વિવિધ કાર્યક્રમ દરમિયાન કંગના અને તેની બહેન રંગોલીએ પરિવારની સાથે ખૂબ જ ડાન્સ કર્યો. આ પહેલા પણ કંગના, રંગોલી, અક્ષત અને રિતુના ઘણાં ફોટોગ્રાફ્સ અને વિડીયો સામે આવી ચૂક્યા છે. 

બોલિવૂડ એક્ટ્રેસ કંગના રનોટના ભાઈ અક્ષતનું પ્રી-વેડિંગ સેલિબ્રેશન પણ ઉદયપુરની એક હોટેલમાં થયું હતું. જેમાં કેટલાંક ખાસ મિત્રો અને પરિવારના લોકો સામેલ થયા હતા. કંગના રનોટે સોશિયલ મીડિયા અકાઉન્ટ પર કેટલાંક ફોટોગ્રાફ્સ શેર કર્યા હતા. અહીં નોંધનીય છે કે મનાલીમાં લગભગ એક અઠવાડિયા સુધી ફંક્શન ચાલ્યા હતા. હવે અક્ષતે ગુરુવારે એટલે કે તારીખ 12 નવેમ્બરે રિતુની સાથે લગ્ન કર્યા છે કે જેમાં સીમિત લોકો હાજર રહ્યા.