હવે લાંબા સમય સુધી રહેવા માટે વારંવાર વિઝા લંબાવવા માટે અરજી કરવી પડશે

અમેરિકામાં કાયદેસર ઇમિગ્રેશન પર કડક કાર્યવાહીના ભાગરૂપે, ટ્રમ્પ સરકારે વિદેશી વિદ્યાર્થીઓ, કલ્ચરલ એક્સચેન્જ વિઝિટર્સ અને પત્રકારો માટે વિઝાની મુદત ઘટાડવાનો પ્રસ્તાવ મૂક્યો છે. બુધવારે જાહેર થયેલા નવા નિયમ મુજબ, આ લોકોને હવે યુ.એસ.માં લાંબા સમય સુધી રહેવા માટે વારંવાર વિઝા લંબાવવા માટે અરજી કરવી પડશે.

આ નવા નિયમો વિદેશી વિદ્યાર્થીઓ, એક્સચેન્જ વર્કર્સ અને વિદેશી પત્રકારો માટે નવી મુશ્કેલીઓ ઊભી કરશે. હાલમાં, આ વિઝા તેમના કાર્યક્રમ કે નોકરીની મુદત સુધી માન્ય રહે છે, પરંતુ નવા નિયમથી આ સમયગાળો નિશ્ચિત થઈ જશે.પ્રસ્તાવિત નિયમ મુજબ, વિદેશી વિદ્યાર્થીઓ માટે F વિઝા, કલ્ચરલ એક્સચેન્જ કાર્યક્રમો માટે J વિઝા અને પત્રકારો માટે I વિઝાની મુદત નક્કી કરવામાં આવશે. આ વિઝાની મુદત ચાર વર્ષથી વધુ નહીં હોય. યુ.એસ. સરકારના 2024ના આંકડા મુજબ, 1.6 મિલિયન વિદેશી વિદ્યાર્થીઓ F વિઝા પર હતા. નાણાકીય વર્ષ 2024માં 3.55 લાખ એક્સચેન્જ વિઝિટર્સ અને 13,000 પત્રકારોને વિઝા આપવામાં આવ્યા હતા.

પત્રકારો માટેનો વિઝા, જે હાલમાં વર્ષો સુધી ચાલી શકે છે, તે હવે 240 દિવસ સુધીના રહેશે. જોકે, ચીનના નાગરિકો માટે આ મુદત માત્ર 90 દિવસની રહેશે.