મુંબઇ 

દર વર્ષે મોટી-મોટી દિવાળી પાર્ટીનું આયોજન કરતાં બોલિવુડ સેલેબ્સે આ વખતે પોતાના નજીકના પરિવારજનો સાથે જ ઉત્સવ ઉજવવાનું નક્કી કર્યું છે. આ વખતે લગભગ દરેક જગ્યાએ સેલિબ્રેશન નાના પાયે થવાના છે તો કેટલાક તો આ દિવસોમાં કામ પણ ચાલુ રાખશે. થોડા દિવસ પહેલા જ એક્ટર સૈફ અલી ખાન ફિલ્મન શૂટિંગ માટે ધર્મશાલા પહોંચ્યો છે. જ્યારે સૈફની પત્ની કરીના કપૂર ખાન મુંબઈમાં પોતાના પ્રોજેક્ટ્સ પૂરા કરી રહી છે. આ વખતે બોલિવુડનું આ પોપ્યુલર કપલ દીકરા સાથે શહેરની ભીડભાડથી દૂર દિવાળીની ઉજવણી કરશે.  

સૈફ અલી ખાન, કરીના કપૂર ખાન અને તૈમૂર આ વર્ષે ધર્મશાલામાં દિવાળીની ઉજવણી કરવાના છે. દિવાળીના પ્લાન વિશે વાત કરતાં કરીના કપૂર ખાને કહ્યું, "સૈફ ધર્મશાલામાં ફિલ્મનું શૂટિંગ કરી રહ્યો છે. હું ત્યાં ક્યારેય નથી ગઈ એટલે તૈમૂર અને હું ધર્મશાલા જવાના છીએ. પર્વતોની વચ્ચે ટ્રાવેલ કરવાનું અને ખુલ્લી હવામાં શ્વાસ લેવાનું અને સૂર્યપ્રકાશમાં સમય વિતાવવો મજેદાર બની રહેશે. એક વર્ષ થઈ ગયું છે જ્યાં અમારે આટલો બધો સમય ઘરમાં રહેવું પડ્યું છે. માટે જ ધર્મશાળા જવું અને ત્યાં સમય વિતાવવો સુખદ રહેશે." 

બોલિવુડમાં તહેવારોની ઝાકમઝોળથી દૂર સૈફ-કરીના અને તૈમૂર કુદરતના ખોળે સમય પસાર કરશે. કરીનાએ કહ્યું, "અમે આ વખતે શાંત દિવાળી ઉજવીશું અને શક્ય હોય તેટલો સમય ખુલ્લામાં વિતાવીશું. આ વખતે દિવાળીની ખૂબ મોટી ઉજવણી નહીં હોય તે ચોક્કસ છે અને હું તેનાથી ખુશ છું. આ વખતે અમે નાનું સેલિબ્રેશન કરીશું." મહત્વનંા છે કે, સૈફ અલી ખાન ધર્મશાલામાં આગામી ફિલ્મ 'ભૂત પોલીસ'નું શૂટિંગ કરી રહ્યો છે. આ ફિલ્મમાં સૈફ સાથે યામી ગૌતમ, જેક્લીન ફર્નાન્ડિઝ અને અર્જુન કપૂર છે. રિપોર્ટ મુજબ, અર્જુન કપૂર પણ આ વખતે ધર્મશાલામાં 'ભૂત પોલીસ'ની ટીમ સાથે જ દિવાળી સેલિબ્રેટ કરવાનો છે. 

જણાવી દઈએ કે, કરીના કપૂર ખાન અને સૈફ અલી ખાન બીજીવાર પેરેન્ટ્સ બનવાના છે. ઓગસ્ટ મહિનામાં કપલે આ ગુડ ન્યૂઝ સંભળાવ્યા હતા. કરીના બીજી પ્રેગ્નેન્સીમાં પણ પોતાનું કામ કરી રહી છે. થોડા દિવસો પહેલા જ તેણે આમિર ખાન સાથેની ફિલ્મ 'લાલ સિંહ ચઢ્ઢા'નું શૂટિંગ પૂરું કર્યું હતું. હાલ તે પોતાના રેડિયો ટોક શોના શૂટિંગમાં વ્યસ્ત છે.