SBI, HDFC, PNB સહિતની બેંકોએ વ્યાજદરમાં ઘટાડો કર્યો

જો તમે હોમ લોન લેવાનું વિચારી રહ્યા છો અથવા તમારી હાલની લોનનો EMI ભારે લાગી રહ્યો છે, તો તમારા માટે એક સારા સમાચાર છે. રિઝર્વ બેંક ઓફ ઇન્ડિયા (RBI) ની ઓગસ્ટ ૨૦૨૫ની નાણાકીય નીતિની બેઠક (MPC) બાદ, દેશની ઘણી મોટી બેંકોએ તેમના માર્જિનલ કોસ્ટ ઓફ ફંડ્સ-આધારિત લેન્ડિંગ રેટ (MCLR) માં ઘટાડો કરવાની જાહેરાત કરી છે. આમાં SBI, HDFC બેંક, PNB, બેંક ઓફ બરોડા અને ઇન્ડિયન ઓવરસીઝ બેંક જેવી અગ્રણી બેંકોનો સમાવેશ થાય છે. MCLR માં ઘટાડો થવાથી લોન EMI ની રકમ અને લોનનો સમયગાળો બંને ઘટી શકે છે, જેનાથી ગ્રાહકોને મોટી રાહત મળશે.

બેંકો દ્વારા વ્યાજદરમાં ઘટાડો

• સ્ટેટ બેંક ઓફ ઇન્ડિયા (SBI) : દેશની સૌથી મોટી બેંકે MCLRમાં ૫ બેસિસ પોઈન્ટ સુધીનો ઘટાડો કર્યો છે. હવે SBIનો MCLR ૭.૯થી ૮.૮૫%ની વચ્ચે છે, જે ૧૫ ઓગસ્ટ, ૨૦૨૫થી અમલમાં આવ્યો છે.

• HDFC બેંક : દેશની સૌથી મોટી ખાનગી બેંકનો MCLR હવે ૮.૫૫%થી ૮.૭૫%ની વચ્ચે છે, જે ૭ ઓગસ્ટ, ૨૦૨૫થી લાગુ થયો છે.

• પંજાબ નેશનલ બેંક (PNB) : PNB એ પણ ૧ ઓગસ્ટ, ૨૦૨૫ના રોજ તેના MCLR માં ૫ બેસિસ પોઈન્ટનો ઘટાડો કર્યો હતો. તેનો એક વર્ષનો MCLR હવે ૮.૮૫% અને ત્રણ વર્ષનો MCLR ૯.૧૫% છે.

• બેંક ઓફ બરોડા : આ બેંકના નવા દરો ૧૨ ઓગસ્ટ, ૨૦૨૫થી અમલમાં આવ્યા છે. તેનો એક વર્ષનો MCLR ૮.૮% થઈ ગયો છે.

• ઇન્ડિયન ઓવરસીઝ બેંક : આ બેંકના નવા દરો ૧૫ ઓગસ્ટ, ૨૦૨૫થી લાગુ થયા છે. તેનો એક વર્ષનો MCLR ૮.૯% છે.

MCLR અને EBLRનો તફાવત

માર્જિનલ કોસ્ટ ઓફ ફંડ્સ-આધારિત લેન્ડિંગ રેટ (MCLR) એ એક બેન્ચમાર્ક રેટ છે જેના આધારે બેંકો તેમની ફ્લોટિંગ રેટ લોન પર વ્યાજ નક્કી કરે છે. જોકે, નવા ગ્રાહકો માટે હવે લોન એક્સટર્નલ બેન્ચમાર્ક લેન્ડિંગ રેટ (EBLR) સાથે જોડાયેલી છે. બેંકો જૂના ગ્રાહકોને MCLR થી EBLR માં શિફ્ટ થવાનો વિકલ્પ પણ આપી રહી છે.

આ વ્યાજદરના ઘટાડાથી આ બેંકોના ગ્રાહકોને હોમ લોન, પર્સનલ લોન અને કાર લોન પર સીધો લાભ મળશે, જેનાથી તેમની EMI ઓછી થશે અને મોટી બચત શક્ય બનશે.