4.0 ની તીવ્રતાનો ભૂકંપ નોંધાયો , પાકિસ્તાન પણ ધ્રૂજ્યું

આભ ફાટ્યાની અનેક ઘટના બાદ હવે હિમાચલ પ્રદેશના ચંબા વિસ્તારમાં એક બાદ એક બે વખત ભૂકંપ આવ્યા છે. પહેલા લગભગ સાડા ત્રણ વાગ્યાના સુમારે એક હળવો ભૂકંપનો આંચકો અનુભવાયો હતો ત્યારે આજે સવારે 4:39 વાગ્યે હિમાચલ પ્રદેશના ચંબા જિલ્લામાં રિક્ટર સ્કેલ પર 4.0 ની તીવ્રતાનો ભૂકંપ નોંધવામાં આવ્યો હતો. તે જ સમયે પાકિસ્તાનમાં પણ 3.7 ની તીવ્રતાનો ભૂકંપ આવ્યો હતો. જોકે, બંને સ્થળોએથી અત્યાર સુધી કોઈ પણ પ્રકારના નુકસાનના અહેવાલ પ્રાપ્ત થયા નથી.

હિમાચલ પ્રદેશના ચંબામાં પણ સવારે 3.27 વાગ્યે ભૂકંપ નોંધાયો હતો. તેનું કેન્દ્ર જમીનથી 20 કિલોમીટર નીચે હતું. આ ભૂકંપ એવા સમયે નોંધાઈ રહ્યા છે જ્યારે હિમાચલ પ્રદેશના વિવિધ ભાગોમાં વાદળ ફાટવાની ઘટનાઓ નોંધાઈ રહી છે. આવી ઘટનાઓ અગાઉ ધરાલી અને હર્ષિલમાં અને હવે કુલ્લુમાં પણ નોંધાઈ છે, જેના કારણે વહીવટીતંત્રની ચિંતા વધી ગઈ છે. અગાઉ સોમવારે રાત્રે હિમાચલ પ્રદેશના કાંગડા જિલ્લામાં ધરતી ધ્રુજી ઉઠી હતી.