નવી દિલ્હી

ઈન્ડિયન પ્રીમિયર લીગની ફ્રેન્ચાઇઝીઓ દ્વારા અવગણાયેલ ભારતીય ટેસ્ટ નિષ્ણાત બેટ્‌સમેન હનુમા વિહારી ઇંગ્લેન્ડના આગામી છ ટેસ્ટ મેચની તૈયારી માટે કાઉન્ટી ટીમ વરવિશાયરમાં જોડાશે.આઈપીએલ બાદ ભારતીય ટીમને ઇંગ્લેન્ડમાં વર્લ્‌ડ ટેસ્ટ ચેમ્પિયનશિપની ફાઇનલમાં ન્યૂઝીલેન્ડનો સામનો કરવો પડશે. ત્યારબાદ ટીમે ઇંગ્લેન્ડ સામેની પાંચ ટેસ્ટ મેચની શ્રેણીમાં ભાગ લેવાનો છે. જમણા હાથનો બેટ્‌સમેન ઇંગ્લેન્ડ પહોંચ્યો છે અને આ સિઝનમાં ઓછામાં ઓછી ત્રણ મેચ માટે બર્મિંગહામ કાઉન્ટીની ટીમ સાથે જોડાશે.

આની પુષ્ટિ કરતાં બીસીસીઆઈના એક અધિકારીએ કહ્યું કે હા, વિહારી આ સિઝનમાં ઇંગ્લેન્ડની કાઉન્ટી ટીમ વરવિશાયર તરફથી રમશે. તે ઇંગ્લેન્ડમાં કેટલીક મેચ રમશે.જોકે વરવિશાયર કાઉન્ટીએ સત્તાવાર રીતે તેની પુષ્ટિ કરી નથી, પરંતુ બીસીસીઆઈ અધિકારીઓના મતે તેના કરારથી સંબંધિત વસ્તુઓ પર કામ કરવામાં આવી રહ્યું છે. તેમણે કહ્યું, 'કરારથી સંબંધિત વસ્તુઓ પર કામ ચાલી રહ્યું છે. તે ઓછામાં ઓછી ત્રણ મેચ રમશે. અમે તે શોધવાની કોશિશ કરી રહ્યા છીએ કે તેને થોડી વધુ મેચ રમવાની તક મળી શકે કે કેમ. ''

વિહારીએ અગાઉ ૨૦૧૯ માં દિલ્હી કેપિટલ્સનું પ્રતિનિધિત્વ કર્યું હતું પરંતુ ત્યારબાદ કોઈ ટેસ્ટ નિષ્ણાતના ટેગને કારણે આઈપીએલની હરાજીમાં કોઈ ફ્રેન્ચાઇઝી તેની માટે બોલી લગાવી શકી નથી. ૨૭ વર્ષીય આ બેટ્‌સમેને ભારત માટે ૧૨ ટેસ્ટમાં ૩૨ ની સરેરાશથી ૬૨૪ રન બનાવ્યા છે. તેણે આ સમયગાળા દરમિયાન એક સદી અને ચાર અડધી સદી ફટકારી છે.