મુંબઇ 

મુંબઈ ઈન્ડિયન્સના સ્ટાર ઝડપી બોલર જસપ્રિત બુમરાહે ઈન્ડિયન પ્રીમિયર લીગ (આઈપીએલ) ટી20 ક્રિકેટ ટુર્નામેન્ટની 13મી સિઝનમાં બુધવારે એક નવી સિદ્ધિ પોતાના નામે કરી છે. બુમરાહે રોયલ ચેલેન્જર્સ બેંગલોર સામેની મેચમાં કેપ્ટન વિરાટ કોહલીને આઉટ કર્યો હતો અને આ સાથે જ તેણે આઈપીએલમાં પોતાની 100 વિકેટ પૂરી કરી હતી. કોહલી ફક્ત નવ રન નોંધાવીને આઉટ થયો હતો. જોકે, બુમરાહની આ સિદ્ધિ સાથે વિરાટ કોહલીનું એક ખાસ કનેક્શન જોડાયેલું છે.

 જસપ્રતિ બુમરાહે બુધવારે બેંગલોરના કેપ્ટન વિરાટ કોહલીને આઉટ કરીને આઈપીએલમાં પોતાની 100મી વિકેટ ઝડપી હતી. કોહલી આઈપીએલમાં તેનો 100મો શિકાર બન્યો હતો. જોકે, ખાસ વાત એ છે કે આઈપીએલમાં જસપ્રિત બુમરાહનો પ્રથમ શિકાર એટલે કે પ્રથમ વિકટે પણ વિરાટ કોહલી જ હતો. બુમરાહે 2013મા બેંગલોરના ચિન્નાસ્વામી સ્ટેડિયમમાં આઈપીએલમાં ડેબ્યુ કર્યું હતું. બેંગલોર સામેની મેચમાં તેણે કોહલીને એલબીડબલ્યુ આઉટ કર્યો હતો. જ્યારે બુધવારની મેચમાં તેણે કોહલીને સૌરભ તિવારીના હાથમાં કેચ આઉટ કરાવ્યો હતો. તે મેચમાં પણ તેણે ત્રણ વિકેટ ઝડપી હતી જ્યારે બુધવારે પણ તેણે ત્રણ વિકેટ ઝડપી હતી. જસપ્રિત બુમરાહ આઈપીએલમાં 100 વિકેટ ઝડપનારો 16મો બોલર બન્યો છે. જ્યારે તે આઈપીએલમાં 100 વિકેટ ઝડપનારો 13મો ભારતીય બોલર છે. બુમરાહ અત્યાર સુધી મુંબઈ ઈન્ડિયન્સ માટે જ રમ્યો છે. 2013મા તેણે મુંબઈ તરફથી આઈપીએલમાં ડેબ્યુ કર્યું હતું અને ત્યારથી તે ટીમનો મહત્વનો ખેલાડી બની ગયો છે. મુંબઈ માટે તે મેચ વિનર બોલર છે. અત્યાર સુધી તે મુંબઈ તરફથી 89 મેચ રમી ચૂક્યો છે.

 જસપ્રિત બુમરાહ આઈપીએલમાં 100 વિકેટ ઝડપનારો 16મો બોલર તથા 13મો ભારતીય છે. જોકે, તે સૌથી નાની વયે આ સિદ્ધિ નોંધાવનારો ત્રીજો બોલર છે. તેણે 26 વર્ષ અને 372 દિવસની ઉંમરે આ સિદ્ધિ નોંધાવી છે. આઈપીએલમાં સૌથી નાની વયે 100 વિકેટ ઝડપવાની સિદ્ધિ સ્પિનર પિયુષ ચાવલાના નામે છે. પિયુષ ચાવલાએ 26 વર્ષ અને 117 દિવસની ઉંમરે આઈપીએલમાં 100 વિકેટ ઝડપી હતી. જ્યારે બીજા ક્રમે રહેલા ભુવનેશ્વર કુમારે 26 વર્ષ અને 133 દિવસની વયે આ સિદ્ધિ નોંધાવી હતી.

જસપ્રિત બુમરાહે બુધવારે કોહલીને આઉટ કરીને ટી20 ક્રિકેટમાં પોતાની 200 વિકેટ પૂરી કરી લીધી છે. આ સાથે જ બુમરાહ ટી20 ક્રિકેટમાં 200 વિકેટ ઝડપનારો ભારતનો પ્રથમ ઝડપી બોલર બન્યો છે. બેંગલોર સામેની મેચ અગાઉ બુમરાહે 168 ટી20 મેચમાં 199 વિકેટ ઝડપી હતી. આ સાથે જ તે ટી20 ક્રિકેટમાં 200 વિકેટ ઝડપનારો ભારતનો પ્રથમ પેસર બની ગયો છે. જ્યારે ટી20મા 200 વિકેટ ઝડપનારો તે છઠ્ઠો ભારતીય છે. જોકે, તેની પહેલાના તમા પાંચેય બોલર સ્પિનર્સ હતા. બુમરાહ અગાઉ પિયુષ ચાવલા (257 વિકેટ), અમિત મિશ્રા (256), રવિચંદ્રન અશ્વિન (244), હરભજન સિંહ (235) અને યુજવેન્દ્ર ચહલ (205) 200 કે તેથી વધુ વિકેટ ઝડપી ચૂક્યા છે. જ્યારે બુમરાહ અત્યાર સુધી 202 વિકેટ ઝડપી ચૂક્યો છે.