દિલ્હી-

ભારતના પાટનગર દિલ્હી અને તેની આસપાસના વિસ્તારોમાં 27થી 19 જુલાઈ વચ્ચે ભારે વરસાદની સંભાવના છે. ભારતીય હવામાન વિભાગે 27થી 29 જુલાઈ સુધી દિલ્હીમાં ઓરેન્જ એલર્ટ જાહેર કરી દીધું છે. દિલ્હીની સાથે-સાથે એનસીઆરના શહેરોમાં પણ ભારે વરસાદ પડી શકે છે. ગયા અઠવાડિયે રવિવારથી બુધવાર દરમિયાન પડેલા વરસાદના કારણે દિલ્હીના રોડ-રસ્તાઓ જળમગ્ન થઈ ગયા હતા.

પ્રાઈવેટ વેધર ફોરકાસ્ટર સ્કાઈમેટ વેધરના મુખ્ય હવામાન વિજ્ઞાની મહેશ પલાવતનું કહેવું છે કે રવિવારથી ચોમાસોનો વરસાદ શરૂ થશે. આ સાથે જ દિલ્હી, નોઈડા, ગ્રેટર નોઈડા, ગાઝિયાબાદ, ગુરૂગ્રામ અને ફરીદાબાદમાં હળવો વરસાદ પડી શકે છે.

સ્કાઈમેટ વેધરના અનુમાન પ્રમાણે હાલમાં હિમાચલના નીચાણવાળા વિસ્તારોના મોનસૂન ટ્રફ રવિવારે દિલ્હી તરફ પરત ફરશે. બંગાળની ખાડીમાંથી ઠંડી હવાઓ પણ દિલ્હી પહોંચશે. જેના કારણે મહિનાના અંત સુધીમાં ધોધમાર વરસાદ યથાવત્‌ રહે તેવી શક્યતા છે.

નોંધનીય છે કે આ વખતે ચોમાસુ દિલ્હી-એનસીઆરમાં 25 જૂનના રોજ જ પહોંચી ગયું હતું પરંતુ ત્યારબાદ 20થી વધારે દિવસ સુધી ત્યાં વરસાદ નહતો પડ્યો. આ રવિવારથી ફરીથી વરસાદ પડવાનું શરૂ થશે જે બુધવાર સુધી રહેશે તેવી હવામાન વિભાગની આગાહી છે.


Comments

કોમેન્ટ પોસ્ટ કરવા માટે લાગિન કરો