ગાંધીનગર-

માર્ચ 2019માં ગુજરાત હાઇકોર્ટે એક કેસમાં આપેલા ચુકાદાને પડકારતી અપીલ કરવામાં એક વર્ષ કરતાં વધુનો વિલંબ કરતાં નારાજ થયેલી સુપ્રીમ કોર્ટે ગુજરાત સરકારને રૂ.25000નો દંડ ફટકારી આળસ અને બેદરકારી માટે આકરી ઝાટકણી કાઢી હતી. જસ્ટિસ સંજય કિશન કૌલે અત્યંત લાપરવાહી સાથે સુપ્રીમ કોર્ટ સમક્ષ જવા માટે ગુજરાત સરકારની ટીકા કરી વિલંબના આધારે અપીલ રદ કરી નાખી હતી. સુપ્રીમ કોર્ટે જણાવ્યું હતું કે, સુપ્રીમ કોર્ટે અરજી રદ કરી નાખી છે તેના કારણે કશું થઈ શકે તેમ નથી તેવું બહાનું કાઢવા માટે સુપ્રીમ કોર્ટ તરફથી મુક્તિ મેળવવા માટે આ પ્રકારના સર્ટિફિકેટ કેસો દાખલ કરાતાં હોય છે.

હાઇકોર્ટ દ્વારા અપાયેલા ચુકાદાને પડકાર આપવામાં ગુજરાત સરકારે 427 દિવસનો વિલંબ કર્યો હતો. સુપ્રીમ કોર્ટે જણાવ્યું હતું કે, ગુજરાત સરકાર દ્વારા ફક્ત કરવા ખાતર આ અરજી કરવામાં આવી છે અથવા તો અપીલ કરવામાં જાણીજાેઈને વિલંબ કરનારા અને સરકારી પ્રક્રિયા પૂરી કરવામાં નિષ્ફળ ગયેલા અધિકારીઓને બચાવવાનો પ્રયાસ કરાયો છે. અમે આ પ્રકારની વિલંબની પ્રક્રિયાને સારી રીતે જાણીએ છીએ.

સુપ્રીમ કોર્ટે જણાવ્યું હતું કે અદાલતે ગુજરાત સરકારને ફટકારાયેલો દંડ જવાબદાર અધિકારીઓ પાસેથી વસૂલવામાં આવે અને રિકવરીનું પ્રમાણપત્ર સુપ્રીમ કોર્ટસમક્ષ રજૂ કરાય. અદાલતનો સમય બરબાદ કરવા માટે સરકારને 25000નો દંડ ફટકારવામાં આવે છે. સરકારે આ રકમ ચાર સપ્તાહમાં સુપ્રીમ કોર્ટ એડવોકેટ્‌સ ઓન રેકોર્ડ વેલ્ફેર ફંડમાં જમા કરવી. કોર્ટે ગુજરાતના મુખ્ય સચિવને આદેશ કર્યો છે કે નિશ્ચિત સમયગાળામાં દંડ ન ભરે તો મુખ્ય સચિવ સામે કાર્યવાહી કરાશે.



Comments

કોમેન્ટ પોસ્ટ કરવા માટે લાગિન કરો