વડોદરા- 

વડોદરા શહેર પાસે બે અલગ-અલગ અકસ્માતમાં બે યુવાનનાં મોત થયા છે. વડોદરા શહેર નજીક જી.એસ.એફ.સી.ના મેઇન ગેટ પાસે મંગળવારે મોડી રાત્રે એસ.ટી બસની અડફેટે બાઇકસવાર બે યુવાન આવી ગયા હતા, જેમાં એક યુવાનનું સ્થળ પર મોત નીપજ્યું હતું, જ્યારે બીજાને ગંભીર ઇજા પહોંચી હતી. ઇજાગ્રસ્તને સયાજી હોસ્પિટલમાં સારવાર આપવામાં આવી રહી છે. આ ઉપરાંત વડોદરા નજીક પોર પાસે બાઈક સ્લિપ ખાઇ જતાં એક યુવાનનું મોત થયું હતું. જ્યારે એક યુવાન ઇજાગ્રસ્ત થયો હતો.

દુમાડ તરફથી જી.એસ.એફ.સી. મેઇન ગેટ થઇ અમદાવાદ જવાના રસ્તે બ્રિજ નીચે મંગળવારે રાત્રે ૧૦ વાગ્યાના અરસામાં અકસ્માત થયો હતો, જેમાં એસ.ટી બસની અડફેટે આવેલા બાઇકસવાર બે યુવકને ગંભીર ઇજા પહોંચી હતી. અકસ્માતના આ બનાવમાં બાઇકસવાર યુવકો પૈકી દીપકકુમાર રામબાબુ સિંગ(ઉં.૨૭)નું ઘટનાસ્થળે જ મોત નીપજ્યું હતું. જ્યારે વિવેક કનૈયાલાલ શાહ(ઉં.૩૭) નામના યુવાનની હાલત ગંભીર હોવાથી તેને સારવાર અર્થે ૧૦૮ મારફત સયાજી હોસ્પિટલમાં સારવાર અર્થે ખસેડવામાં આવ્યો હતો, જ્યાં તેની સારવાર ચાલી રહી છે.

બંન યુવાનો મૂળ બિહારના જગદીશપુર ગામના રહેવાસી છે અને હાલ રાયકા ગામ પાસે એલએન્ડટી કંપનીનું કામ કરતા હતા અને ત્યાં જ રહેતા હતા. બ્રિજ નીચે થયેલા અકસ્માતમાં બાઇકસવાર બન્ને યુવકો દુમાડ ચોકડીથી અમદાવાદ તરફ જઇ રહ્યા હતા. એ સમયે એસ.ટી. બસની અડફેટે આવતાં અકસ્માત થયો હોવાનું પ્રાથમિક માહિતી અનુસાર જાણવા મળી રહ્યું હતું. અકસ્માતને પગલે છાણી પોલીસે ઘટનાસ્થળે પહોંચી વધુ તપાસ હાથ ધરી છે.


Comments

કોમેન્ટ પોસ્ટ કરવા માટે લાગિન કરો